|
Munaasabad lagu maamuusayay Maalinta Afka hooyo ee Soomaaliga oo maanta laga xusay Magaalada Muqdisho Xaflad ay soo qabanqaabiyeen Naadiga Hal-abuurka iyo Qorayaasha Soomaaliyeed (Somali Speaking Pen) oo lagu qabtay magaalada Muqdisho ayaa waxaa lagu xusay maalinta Afka Hooyo oo ku beegan 21ka Nofembar. Xafladda oo ay ka soo qaybgaleen dad Soomaaliyeed oo aad fara badan iyo martisharaf ka socotay qaybaha kala duwan ee waxbarashada dalka, sida Jaamacadaha, Iskuullada, Macaahidda, Abwaaniinta, Qorayaasha iyo Saxaafadda ayaa waxaa hadallo ka jeediyay xubno kala duwan oo kala duwan.
Ugu horreyn waxaa ka hadlay xoghayaha laanta Koonfurta ee Somali Pen C/naasir Yuusuf Macallin(Ganey), wuxuuna sheegay in xuska maanta la qabanayo uu qayb ka yahay xusaska in ka badan 6-kun oo luuqadood oo dunida looga hadlo. Xoghayuhu wuxuu sheegay in Laanta Koonfurta Somalia ee Somali Pen intii ay jirtay ay qabatay howlo badan oo lagu horumariyay afka Somaliga, wuxuuna sheegay in howlahaas oo dhan ay noqdeen kuwo lagu guulaystay horumar la taaban karana laga gaaray.
Sidoo kale, waxaa hadal ka jeediyay xafladdaas Prof. Mustaf C/llaahi Cali (Dheeg) oo Barre ka ah Jaamacadda Muqdisho, isagoo si weyn ugu dheeraaday Afka Soomaaliga iyo muhiimaddiisa, wuxuuna sheegay in afka uu ka soo uskumo Hooyada, dhulka iyo Dadka. "Afka Soomaaliga, wuxuu ka mid yahay afafka dowliga ah ee dunida ka jira, wuxuuna ka mid yahay afafka Kushitiga ah ee looga hadlo dalalka Bariga Afrika, isagoo weliba ah afka ugu baaxadda weyn, maadaama uu yahay af leh maamul dowli ah oo loo shaqeeyo xafiisyada iyo howlaha kale ee Soomaaliya" ayuu yiri Mustafa Dheeg. Mar uu ka hadlay khatar sababi karta inuu afka Soomaaliga noqdo mid gebi ahaan baaba'a ayuu sheegay inaysan taasi muuqan, qarniyada soo socda xitaa uusan ku imaan karin afka Soomaaliga burbur, maadaama afka Soomaaliga uu yahay luuqadda labaad ee Luuqadaha Bariga Afrika, isagoo sheegay inay ku hadlaan in ka badan 25-milyan oo qof. "Dadka ku hadla Afka Soomaaliga waa kuwo ku firirsan dalalka Soomaaliya deriska la ah sida, Jabuuti, Itoobiya iyo Kenya, waxaana sii dheer intaas dadka Soomaalida ah ee ku nool dalalka ku yaalla shanta qaaradood ee Dunida" ayuu yiri Prof. Dheeg, oo sidoo kale ku boorriyay saxaafadda inay culeyska saaraan sidii Afka Soomaaliga uu ku noqon lahaa mid horumar intaan ka badan sameeya.
Guddoomiyaha Golaha Suxufiyiinta Qaranka Soomaaliyeed Yuusuf Cali Cusmaan iyo Maxamed Ibraahim Isaaq (Pakistan) oo ka mid ah xubnaha INSI iyo C/raxmaan Cumar Madoobe (Caaqil Dalmar) oo ah Xoghayaha warfaafinta ururka (NUSOJ) ahna qoraa sare ayaa si wadajir ah u sheegay in afka Soomaaliga uu yahay mid horumar sameeyay, isla markaana laga doonayo saxafiyiinta inay horumarka Afka Soomaaliga ka shaqeeyaan.
Ku-simaha Guddoomiyaha Somali Pen laanteeda Koonfurta Somalia Mr. Dhicisoow oo hadal ka jeediyay halkaas ayaa waxa uu u mahad celiyay ka soo qaybgalayaasha iyo cid walba oo gacan ku siisay Somali Pen horumarinta Afka Soomaaliga. Suugaanley kala duwan ayaa waxay xafladda ka soo jeediyeen erayo suugaaneedyo ay ku cabirayaan horumarka Afka Soomaaliga, waxaana abwaannadaas ka mid ahaa: Barre Maxamed (Bangaladesh), Cumar C/llaahi Guure iyo Saynab Sheekh Maxamed.
Xafladdaas ayaa waxaa lagu soo bandhigay joornaallo iyo Buuggaag ka soo baxay gudaha dalka Soomaaliya tan iyo intii afka Soomaaliga la qoray, lana hirgeliyay.
Abdirashid Abdullahi haydar xeydar1@hotmail.com www.jiimonet.com Mogadishu-Somalia.
|
