|
Cabdicasiis Mukhtaar Qariidi ayaa ka warbixiyay dib u dhac ku yimid shirkii dib u heshiisiinta beelaha Jubbooyinka ee Magaalada Kismaayo Xoghayaha dib u heshiisiinta qaranka Soomaaliyeed Mudane Cabdi-Casiis Muqtaar Qariidi ayaa ka war bixiyay dib u dhaca ku yimid shirkii 15/3/2008 ee lagu balan sanaa in uu maanta dib uga furmo magaalada Kismaayo. Shirkaan dib udhaca ku yimid ayuu xoghayaha mudane Qariidi ku saleeyay isbadalada ku yimid xukuumaddii hore ee Prof Cali Max’ed Geedi iyo tan hadda ee uu ra’iisul wasaaraha u yahay Nuur Cadde iyo xaaladaha isdabataalla ee kusoo kordhay dalka Somalia. “Aad iyo aad baan uga xumahay inuu shirkaan dib u dhac ku yimaado, madaama aan horay u go’aaminnay shirkaan, dib u dhaca waxa keenayna waa duruufo dalka ka jira iyo sababo badan oo la xiriira xagga Logistic-kada iyo isku dubaridkiisa iyadoo la ogyahay marxaladaha uu dalku marayo” ayuu yiri C/casiis Qariidi. Mudane Qariidi ayaa ka warbixiyayh sidoo kale safarradii ay horay ugu tageen gobollada Jubbooyinka, wuxuuna xusay inay u tageen arrimo khuseeya dib u heshiisiinta beelaha ku dhaqan halkaas. “Beelaha reer Kismaayo iyo dhammaan dadka jubbooyinka waa dad bislaaday oo laga filayo inay nabadda sii ambaqaadaan, aniga halkaas muddo ayaan joogay, waxaan kusoo arkay dad badan oo isugu jira rad iyo haween, kuwaasoo hormuud u ah u ololeynta nabadda, haddana kama filayo inay is colaadinayaan dadka ku nool jubbooyinka oo isugu jira Somali weyn kana kooban 11-qabiil, isuguna sii dhex jira 4.5-ka oo ku dhisan awood qaybsiga Dowladda” sidaa waxaa yiri Qariidi. Mar uu ka hadlayay guddiga dib u heshiisiinta Qaranka ayuu yiri Qariidi: “Guddiga dib u heshiisiinta qaranka, wuxuu raadinayo waa nabad iyo wadanoolasho, adduunkana way ka dhacdaa in shirar caalami ah uu dib u dhac ku yimaado, INSHA ALLAAH, waxaan ku talageli doonnaa inuusan dib u dhac dambe ku imaan shirarka dib u heshiisiinta” Dhanka kale, dadka deegaanka Jubbooyinka gaar ahaan kuwa dhaqanka iyo nabadda ayaa la sheegayaa inaysan ku qanacsanayn inuu dib u dhaco shirkaas oo muddo dheer ay sugayeen. Beelaha ku nool Jubbooyinka ayaa waxay dusha kaga tuureen Dowladda Somalia eedeyn ku aaddan inaysan isku-shuqlin qabsoomidda shirka lagu nabadeynayo Jubbooyinka; madashiisuna tahay Kismaayo. Abdirashid Abdullahi haydar www.jiinwabi.com E-mail:- xeydar1@hotmail.com Mogadishu-Somalia.
|