|
January 8/2008 (Jiinwabi.com News) Jilib/Gosha Dagaal ba’an oo shallay tuulada Kumbarera, ee ka tirsan degmada Jilib/Gosha ku dhexmaray laba maleeshiyo beeleed, oo ka kala tirsan beesha Jareerweyne, iyo maleeshiyo isku dhaf ah oo kakooban Jileec iyo Jareer. Dagaalkaasi oo labada ninacba ay adeegsanayeen, qoryo gacmeedyo iyo fallaaro, ayaa la sheegayaa inuu ku dhintay hal ruux, saddax ruuxna ay ku dhaawacmeen, iyadoo dadka dhaawac soo gaaray haatan lagu daaweynayo isbitaalka Mareerey ee degmada Jilib Qaar ka tirsan mas’uuliyiinta Hogganka Beelaha Jareerweyne, ee degmadaasi Jilib oo aan qadka telefonka kula xiriirnay, ayaa noo sheegay, inuu dagaalkan dhacay, kadib, markii maleeshiyo isugu jira Jileec iyo Jareer ay ka soo duuleen magaalada Jilib, kuna soo duuleen Bar ciidan oo ay leeyihii beelaha Jareerweyne, oo ku taal tuulada Kumbarera, oo 15 kiilo mitir u jirta magaalada Jilib. Odayaasha Jareerwyne ayaa waxay sheegeen: in maleeshiyada soo duushay, ay ku socdeen qorshe, laga soo baaraan degay, looguna talagalay, in lagu tirtiro ama lagu baabi’iyo Bartaasi Ciidan oo ay leeyihiin beesha Jareerweyne, hase yeeshee, bay yiraahdeen odayaashu, way u suurtoobi wayday riyadoodi, meesha ay ka soo duuleen ayaana dib loogu celiyey, waa sida odayaasha ay sheegeen. Odayaasha oo ka jawaabayey, su’aal aheyd, Maxaa maleeshiyada Jareerta ah ku biiriyey maleeshiyada Jileeca? Waxay odayaasha ku jawaabeen: Maleeshiyada Jareerta ah oo la safnaa maleeshiyada Jileeca ahaa, waxay ahaayeen dhallinyaro aad u tiro yar oo uu duufsaday nin lagu magacaabo Maadey Cusmaan Kasamila oo u dhashay beesha Jareerweyne, hase yeeshee, hunguri dartiis u sheegtay qabiil ka mid ah qabaa’ilka Jileeca, sidaasi darteedna, Gudoomiye ku xigeenka degmada Jilib ay ku magacaawdeen qolo is laheysiisay maamulka degmada Jilib, maamulkaasoo beesha Jareerweyne aysan aqoonsaneen, Waxayna odayaasha intaasi ku darayaan inuu Maadey Cusmaan Kasamila uu magaalada Jilib ka soo kaxeystay maleeshiyadan Jileeca u badan, si loo baabi'io xoogagga Jareerta ah oo ay sameysteen dadka deegaankasi u dhashay oo Jareerta ah. Dagaalka oo haatan istaagay, kadib markii qolada soo duushay ay ku fashilmeen ujeedadooda, ayaa waxaa haatan la hadal hayaa, in odayaasha labada dhinac ay fariistaan kana arinsadaan, dhibaatan dhacday iyo cidda bilaawday, iyo in aysan dhibaato noocan oo kale ah aysan dib u dhicin. Waa markii ugu horeeysay muddo 15 sanna ah, beelaha deegaankaasi dagaal noocaan oo kale ah uu dhexmaro. Odayaasha beelaha Jareerweyne ee degaankaaso Gosha, ayaa waxay sheegeen, muddadii lixda bilood ee maxaakiimta, wixii ka horeeyey, in beesha Jareerweyne ay deegaanka Gosha ku laheyd ilaa lix Bar ciidamo hubaysan, oo burcadda iyo beelaha wax daandaansaday ka ilaalisa Ibrahim
Maxamed cabdi (Ibrahim Akuja)
|